Mir schmeckt koi Veschber meh',
Seit i dees Mädle gseh',
I bin vor Aufregung scho halbe hee',
Sogar de Bachsteikäs',
Den i sonst so gern ess',
Den lass' i eifach uf em Teller steh',
I lauf im Kopf ganz domm
Wie'e daube Henne rom.
Ha, Heiligsblechle, deescht doch nemme schö.
I wälz mi nachts im Schweiß.
I träum von was net weiß.
Es wird mir kalt ond heiß, wann i sie seh':
O Anna Scheufele aus Kaltetal,
Tochter vom Bürschtebinder.
Du bischt mein Schtern, mein Ideal,
Meine Zahra Zylinder!
Seit ich für Dich mein Herz entdeckt,
Mein i, mi häb das Kätzle gschleckt.
I strahl bei Deinem Anblick bloß
Wie'e Äpfelbutze auf d'r Schtroß,
Du herzigs, goldigs Teufele.
O Anna Scheufele, o Anna Scheufele aus Kaltetal,
Glücksblatt in meim Kalender,
Mach mich zum Ritter Deiner Qual
Zum Vadder Deiner Kinder.
Mir sind im Kino gwe',
Hent d' Rotraut Richter gseh',
Ich saß am Sperrsitz, sui hat müeße schteh',
"Weischt Anna", sag i glei',
"Du därfst net traurig sei,
Die zweiehalb Schtond ganget au vorbei!"-
Anschließend semmer halt
ins Jägerhaus am Wald,
hent Kaffee tronke ond sui hat en zahlt.
Heimwärts beim erschte Kuss
Verschtaucht sie sich de Fuß,
I därf se trage bis zum Omnibus:
Die Anna Scheufele aus Kaltetal,
Tochter vom Bürschtebinder!
Nur wer die Lascht hat, hat die Qual,
Sie wog zweieinhalb Zentner.
Der Weg war gottsallmächtig weit,
I hab's direkt am Kreuz bereut.
Wie sie mich zart am Ohrloch kratzt,
Ischt mir d'r Hoseträger gfatzt.
Sie frogt: "Bin i Dei Teufele?"
O Anna Scheufele, o Anna Scheufele aus Kaltetal.
Bin i von Gott verlasse?
I han bloß meine Hose ghebt
Ond's Mädle plotza lasse.
Mei Freund, d'r Karle Mauth
Der hat jetzt au e Braut,
Des hat er mir do neulich a'vertraut,
E pfondigs Bolleweib
Mit "sex appeal" im Leib.
Er glaub, dass em dui o'bedingt treu bleib.
O'schuldig, rein und hold,
Dr'zue no treu wie Gold.
Ob i sie net amol sehe wollt'?
Druf nimmt er sei Etui,
Zeigt ihr Fotografie.
I schrei: "Dui kenn i doch - des ischt doch die:
Die Annna Scheufele aus Kaltetal.
Der Schmerz verreißt mir d' Kuttel.
O falsche Sehnsucht meiner Qual,
Du o'verschämte Zuttel,
Verloge's Weibsbild, nix hat gstimmt,
Gang weiter mit Deim Karle fremd.
Dem schick i morge uf d'r Schtell
Mein Sekondaner zom Tunell.
Von mir aus gang zom Teufele!
O Anna Scheufele, o Anna Scheufele, Du Lompetier!
I bleib für mi, deescht gsünder,
Ond wann i alt bin als Rentier
Zieg i zu meine Kinder!
