Er: Alte, was moinscht, soll i net an Regaschirm mitnamma?
Sie: Wia de willscht, Hans!
Er: I glaub, s' wird heit net heba! S'ischt so schwül draußa ond Mugga schwirrat so in dr Luft romm, s'wird gut sei, wenn i mein Regaschirm mitnemm!
Sie: Hosch reacht, nemmscht en mit!
Er: Aber dr Schpazierstock wär mir zom Laufa schon bequemer! Wenn's am End doch schee bleibt, no isch mir dr Schirm bloß im Weag. I vergess denn au leicht ond lass en am End gar no irgendwo schtanda! S' wird doch gwieß gscheiter sei, i lass den Schirm drhoim ond namm an Stecka mit!
Sie: No lass'n halt do!
Er: Aber wenn's no regnat? Auf'm ganza Weag ieber d' Alb isch nirgends a Dach. I kann mi et onderschtella! Mo soll i me onderschtella?
Sie: No nammschn halt mit!
Er: Aber s' isch gar koi scheener Schirm maih! - So alt, so verrissa! - Richtig schäma muaß ma sich mit dem!
Sie: No laschdn halt do!
Er: Wenn i aber soichnass werd, he? S' wär halt doch besser, wenn i en mitnemma dät!
Sie: No nammschn halt mit!
Er: S' kennt aber au a Regaliftle sei, solche Liftla isch et zom Traua!
Sie: No nimmsch'n halt mit!
Er: Aber s' hot sich doch schau so manchs Gwitter wieder vrzoga? Aber wenn's no wieder kommt! Des Gwitter, dann kommt’s am End erst heit auf d'Nacht und bis dahin bin i schau lang wieder drhoim!
Sie: No lass en halt do!
Er: Aber dui Sonn, die gfellt mir gar et. Dui zuiht Wasser! Sag selber, dass dui Wasser zuiht. I glaub, dass heit doch no ebbes kommt!!!
Sie: No nemmsch'n halt mit!!!
Er: Aber halt - mei Katarrh! Woisch doch, dass i so leicht an Katarrh kriag, bei meirar zarta Natur. Ewwel wenn i in d' Nässe komm, lauft mir glei d' Nas!
Sie: No nemmscht en mit!
Er : So, ond an main nuia Kittel denkscht et? Hau i net erscht kürzlich em Schneider an Haufa Geld naglegt für's Wenda? Wenn der en Reaga kommt, verliert der sei ganza Fassoh.
Sie: No nemmscht en halt mit!
Er: Ja Herrschafts-Sechser nomol! Was hoißt des eigentlich: nemm en mit, lass en do? Woisch du überhaupt no, was de willscht? Des rommzieha, oimal so, oimal so, des ka i omms Verrecka et leida. Dass ihr Weiber au nia wissat, was ihr wellat! Jetzt nemm i grad zom Bossa extra nix mit!!!
